.comment-link {margin-left:.6em;}

على باب الله

انا من أهل مصر ، بسيط وغلبان بالعربي على باب الله

Monday, December 05, 2005

(مرحبا في عالم التدوين) .. في التاون هاوس

يقيم التاون هاوس ندوة يوم 19 ديسمبر في السابعة مساء بعنوان مرحبا في عالم التدوين ، يتحدث فيها نائلة حمدي أستاذ الإعلام بالجامعة الأمريكية ، ومعتز عطا الله ( مدون) وعبد الكريم مرديني ( صاحب شركة مصدر مفتوح) ، العنوان السابق للندوة كان التدوين والصحافة التقليدية

تفاصيل أخرى علية حمزة( التاون هاوس)

Sunday, December 04, 2005

ماتهاجر يا جمال

عزيزي جمي .. أنا طبعا شلت الألقاب لأننا أولا من سن واحد تقريبا ، وثانيا الكلام اللي عاوز أقولهولك محتاج إننا نشيل التكليف ، ورغم إني شبه متأكد إنك مش بتقرا بلوجات دلوقتي (علشان الحالة النفسوية الصعبة اللي انت فيها – تواردت الأنباء انهم استوردوا له أطباء نفساويين من برا لوصول حالة " انا مش غبى وفاشل أنا سمارت وانتليجينت " التي انتابت جمال منذ ظهور نتائج الجولة الأولى للانتخابات واكتساح الإخوان المسلمون ،) إلا أن حقيقة سبب كتابتي لك هذا الخطاب هو إنك بجد صعبان على خالص خالص ، مش ذنبك إن أهلك استكردوك وفهموك إنك ممكن تبقى الريس الجاي ، مش ذنبك إن أهلك نسيوا يوضحوا لك معلومة بسيطة إن مصر يا جيمي مش مصر الجديدة ، مصر الجديدة هي الحتة بس اللي انتوا ساكنين فيها ، إنما مصر دي بلد واسعة خالص ، كبيرة بجد ، فيها ناس كتييييييير ، ناس تلات تربعهم ولا يعرفوا عنك حاجة ، ولا أنت أساسا ليك أي علاقة بيهم ، خدعوك يا مسكين وفهموك إن مصر هي عزبة أبوك وبالتالي من حكم في مال أبوه ما ظلم ، وكانت لديك – وقد اتفقنا على الصراحة – استعداد لتصديق هذا الهبل

في ظل ظروف إقليمية ودولية ، لتوريث بشار في سوريا ، وصعود واحد فاشل " باعترافه " كبوش لسدة الحكم في أكبر دولة في العالم ، أصبح السؤال " وليه لأ ؟ ، وحش جمال ! ماينفعش جمال ، دا حتى إحنا صارفين دم قلبنا – او قلب الشعب المصري على تعلميه – واحسب سوزي امسكت بخديك وهي تتلى آيات المديح في ولدها الصغير قبل أن تهزهم شمالا وياسارا " ياخختتتتيي" !!

وفي ظل فشلك على مستويات عدة ، حتى في وظيفة البنك بتاع لندن ، كنت على المستوى الإنساني تريد شيئا كبيرا يعوضك فشلك ، تريد أن تثيت لنفسك أنك ناجح ، ناجح قوي بالثلث ، وبعنف ، وعندما عدت لمصر بعد شراء ديون مصر برخص التراسب من المدينيين الغلابة لإعادة بيعها لمصر بثمنها بالإضافة لسعر الفوائد ، لم يشعرك الأمر بالنجاح الذي يعوض إحساس الفشل المزمن الذي تشعر به ، وكان وقتها "العجوز" يوغل أكثر بأكثر في أرذل العمر ، وكانت الثروات تتضاعف وخاصة مع إجتهاد شقيقك الأكبر علاء ، فكان الأمر يستلزم بعض التدبر ، فكانت لجنة السياسات ، والخطة البايييخخخخخااا أن تتولى بعد ذلك "الحزب" الوطني ، وبعد كده يا جميل ع الكرسي الكبير ، لكن للأسف لم يبلغك أحد أنه لا يوجد شئ اسمه الحزب الوطني( الذي هو ليس أكثر من تجمع للمصالح يتسم بالهشاشة " الوصف لنبيل عبد الفتاح" لو تم حله غدا رغم ما يقال أن عدد أعضاؤه ماعرفش كام مليون لن تجد بني آدم واحد في الشارع بيسأل عنه ، وسيكون أشبه بالفضلات التي لا نلتفت إليها بعد شد السيفون( آسف للتعبير البايخ لكنه أكثر ما أراه منطبقا على الحزب) ، فهو وبجد ليس أكبر من خرابة كبيرة متعددة الأفرع ، مجموعة ناس متسلقين فشلة ، أنا آسف لذكري كلمة الفشل ، حتما تسبب لك آلاما مبرحة - وللأسف كان تفكيرك أن تعيد إحياء الحزب فكر فاشل جدا ، تطور إيه أساسا ، ما مافيش حاجة من أصله ، مش مصدقني ، إمشي في الشارع إسأل أي حد ، بيعمل إيه الحزب الوطني ده ؟ وإن كان اللي قدامك شكله مثقف زودها معاه وقله " طب برنامجه إيه ؟ مين هما عظماؤه ، ما أهم ما قدمه للبلد ..الخ ؟

جمال صدقني الموضوع خرج عن التحكم ، وممكن تكون مش مصدق تحذيري لك مما قد يحدث، محتميا في ذهنك بالجيش الجرار و البوليس الفزيع ، لكن مين كان مصدق إن عدي وقصي بقصورهم الهايلة وكل ما كان لهم أن يقتلوا مثل الصراصير ، الأفترى وحش وهما كانوا مفتريين وكانت نهايتهم سودا ، صدقني الجيش اللي انت وأبوك فرحانين بيه قرفان منكم أكتر من أي حد ، والبوليس مننا فينا لما يجي الجد الناس كلها خلاص نفسهم يرموك انت وأبوك وأمك في أكبر زبالة ، لكن على فكرة أنت ما تستحقش دا ، انت أساسا ما لكش ذنب ، هما الله لا يسامحهم اللي عملوا فيك كده ، وعلى كل حال الشعب المصري مش دموي، مش هاتكون ناهيتك كصدام وعجي ، لكن في نفس الوقت موضوع شجرة الدر قالقني عليك ومش عارف ليه حاسس ان نهايتك ممكن تكون مشابهه ، مع الاختلاف في موضوع القباقيب – للأسف انقرضت هذه الأداة اللطيفة في التخلص من الحكام الظلمة – لذلك ربما يتم اللجوء إلى الجزم.

زي لما قلت في البداية أنا معاك ، وانت صعبان علىّ موت ، علشان كده أنا باكتبلك علشان أقولك خلاص انت ما فيش قدامك غير الهجرة ، في كندا بيرحبوا برجال الأعمال اللي في سنك ، والباسبور الإنجليزي اللي معاك هايسهل الأمور ، خدلك تأشيرة هجرة وقول يا فكيك ، انسي هناك أمك وأبوك وأبدأ حياتك من جديد ( أيوه ,وكأن عمرك ما عشتها ) انسي مصر خالص ، وف كندا او استراليا هاتلاقي نفسك ونتبقى نفسك ، مش عيل ماسك في ديل أبوه وأمه ، صدقني انت دلوأتي مش أدامك غير كده ، هاجر يا جمال ، هاجر بجد ، صحيح الشعب المصري مش دموى ومش هايعمل فيك اللي عمله في صدام وعدي واللي كانوا برضه متصورين إن ده عمره ما ممكن يحصل لهم ...لكن ما حدش ضامن ايه ممكن يحصل

أنا بادعيلك إن ربنا يهديك ، والغباء وبطئ البديهه الوراثي الذي ورثته عن موبي واللي إمتزج بالصلف الأحمق والغطرسة المزمنة اللي ورثته عن سوزان لا يجعلك تتصور أن الأمريكيان سيساندوك ، أنت سيد العارفين إن الأمريكان دول ولاد لزينا ،وهايبعوك عن اول ملف ، وانت اكيد فاكر إن هما اللي إدوا صدام الجرين لاين لدخول الكويت ثم عملوا فيه اللي عملوه ، وبهدلوا مامته ، هاجر يا ابني بجد وقول يا فكيك ، بدال ما تتبدهدل بجد ، انت ما لكش في الطور ولا ف الطحين ، وساعة الجد هاتبقي زي الطور اللي هاتكتر سكاسينه ، ماتهاجر بقى يا جمال ...